呢晚，我成晚都无瞓过，房间好静，静到我连街外边噶喇叭声同隔离D狗吠声都听得清清楚楚。半夜，我听住老豆瞓觉噶鼻鼾声同夹带住噶两下咳嗽声，发觉，原来，我已经长大左，受到委屈，遇到挫折，我已经唔可以再返到阿爸阿妈噶怀抱里面避难，呢一刻，我好难过，真系好难过。
就系咁，我度过左自己高考完噶第一个晚上。
第二朝，阿爸阿妈照样好早起身，各自整理返工，照样生活，我无力咁摊系床上，无神噶眼睛望住窗外阳光肆无忌惮咁射住我，我feel到妈妈轻声细气咁走入我房，睇我醒左未。
妈见我望住窗外：“仔，醒左啦？咁早醒啦。”
“唔。”我无力咁回左一句，系我一贯对待母亲噶态度。
妈：“我地出门口啦，中午D饭叮耐D先好啊，瞓下添啦。”
老豆妈子中午通常都唔会返嚟，妈妈佢前一晚都会煮多D饭，留一D到第二日噶中午，叫我自己用微波炉叮热，自己搞掂，只要我系屋企就会咁样，我都习惯晒。
妈妈补充句：“记得吃早餐啦，休息下啦。”
“走啦。”
轻轻噶关门声，老豆妈子出门继续开始佢地噶辛勤工作，日子唔会因为我考衰左而停止，太阳照常高高挂，又有几多人记得原来寻日曾经落过雨？
假期。
呢个系真真正正噶假期啊，无堆积如山噶功课，无担惊受怕噶补课，完完全全，自由自在噶假期，系我期待已久噶假期，可惜宜家噶我真系一D享受假期噶心情都无，天系蓝色噶，但系我噶心系灰色。
寻晚谂得太多，D脑神经开始有D神经，又唔吃晚饭，加埋之前噶高考72小时，身心由一个极度紧张状态变到极度悲伤状态，搞到宜家好似有D头皮发麻，脚仔发软，仲犀利过一夜7次，睇嚟攰下再瞓真系比较好。
唔知过左几耐，一阵清脆噶鸡鸣声系我耳边响起，唔系闹钟，系我部手机噶来电铃声，我用噶系NOKIA1600，一部跟左我N年噶老式手机。
系妈妈打嚟噶电话。
妈：“仔，吃饭未啦？有无瞓觉啦？D饭叮左几分钟啊？够唔够热啊？”
我妈就系咁，机关枪式噶问题，进击式噶关怀，以前我次次都觉得好烦，烦到我都唔想开口应佢，但系唔知点解，突然，我觉得好温暖，原来自己一直忽略左世界上最温暖噶野。
我有D糊涂，妈妈唔系啱啱出门口咩，点解又即刻打电话嚟，望一望手机原来已经12点半。
“未啊，啱啱瞓左。”
妈：“吃左饭先瞓啦，记得整热D饭啊，热D先好吃啊。”
我揉左两下眼：“唔，得噶啦，我识整噶啦。”
妈长气：“唔，咁好啦，咁你自己小心D啦，无乜嘢啊嘛？”
我：“无乜啦。”
妈：“咁小心D啦，快吃饭啦。”
我：“得噶啦。”
嘟.嘟.嘟。。
迷迷糊糊，朦朦胧胧，赖多下床先。
第二次醒已经成点钟，寻晚无冲凉，宜家仲附送住一浸隔夜噶男人香，果断洗下先。
走到冲凉房，望住镜入边噶自己，越睇越唔顺超，越睇越扯len晒火，望住呢个讨厌噶自己，通常男人唔锯噶时候都会做一D好冲动兼好弱智噶行为，而我就好冲动咁做左一个好弱智噶举动，一拳打落块镜度，我知道呢种老土发泄方法只有脑残电视剧同埋D抗日神剧先会出现，但系我宜家照样好戅居咁打左出嚟，块镜根本打唔烂，但系我只手好痛。
